المستحيل
فى رثاء فقيد الشباب عباس الرشيد احمد سمساعة خال عثمان السيد اللغا واخوانه
مستحيل ننساك وننساك؟؟ دا رابع المستحيل
وتظل ذكراك تتجدد ما دام النهار والـلــــيــــل
ونارك تـــلـتـهـب جوانا حرقت لى حشانا عديل
وكل النور نشوفوا ظلام بعد ما انطفى القنديل
وكيف ننساك؟ وما بننساك انت الكنت لينا دليل
ووين نرتاح؟ وكيف ننجم؟ ما انت كنت ضليل
احزانا عليك اكيد حا تطول ولا زالت دموعنا تسيل
دموعنا عليك ما بتجف دموعنا عليك زى النيل
تجف دمعة تسيل دمعات تتقاطر تحاكى السيل
تعبنا خلاص من الآهات وضقنا المر شربنا عديل
شربنا من الالم جرعات وما خلينا منو فتيل
كنت كريم وكنت بشوش باسم ديمة غير تمثيل
وما بتزعل وما بتنهر وتمسح فى الالم وتزيل
تواصل ديمة كل الناس غرب وشرق نهر النيل
وسريع غادرت يالعباس خليت تومك يقاسى الويل
وخليت هالة والاخوات يحسبن فى نجوم الليل
وخليتنا الجميع حيران ومفجوعين شديد بلحيل
وعارفين الاجل محتوم ومسطر فى محكم التنزيل
وموتك عشنا باللحظات لكن ايمانا اظنو قليل
وعارفين تانى ما بترجع وغير الصبر مافى بديل
نسال ربنا الرحمـــن يغسـلــك بالــبــرد تغـسـيل
ويدخلك فى عدن جنات واسع الرحمة بيك كفيل
ويلهمنا الصبر بعدك ثوابو واجرو ليك جزيل
الثلاثاء يناير 31, 2012 11:10 am